Од Здружението на новинарите на Македонија – ЗНМ информираат дека ќе поднесат претставка до МВР за попречување на новинар при вршење на професионална работа од страна на полициски службеник.
„Имено, во текот на вчерашната ноќ при протест на вработените на ЈП Комунална Хигиена Скопје, новинарот Суад Бајрами од Порталб.мк не бил во можност да ја извршува својата работна задача односно да снима во моментот кога интервенирала специјалната единица“, велат од новинарското здружение.
Од ЗНМ посочиваат дека според пријава од новинарот, тој вчера вечер бил присутен на јавен простор во кругот на ЈП Комунална хигиена да известува за актуелна тема, но не можел да го стори тоа, бидејќи полициските претставници се однесувале непрофесионално кон него, односно му попречиле да ја врши работата.
,,Полициските службеници ме тргнаа на страна под оправдување дека таму бил периметарот на безбедност, иако јас им укажав неколку пати дека на местото каде што ми наредија да одам не можам да имам добар кадар за снимање” ни укажа Бајрами.
Од ЗНМ сметаат дека со оваа постапка полициските службеници не се однесувале професионално и го прекршиле правото на новинарот да известува од јавен простор за теми кои се од интерес на граѓаните.
„ЗНМ како еснафска организација која ги штити правата и интересите на новинарите и медиумските работници во земјава дава целосна поддршка на колегата Бајрами и во консултација со адвокатскиот тим ќе биде поднесена претставка до Секторот за внатрешна контрола и професионални стандарди при МВР“, се вели во соопштението.
